Ercakap Tendi

by: Saprillia Ginting Suka & B. S.

Enggo sehkel dekahna i eteh maka Arihta Sembiring Depari ras Litna Br. Karo-karo Sinuhaji meriah erteman-teman. I bas sada paksa Kerja Tahun i kuta, i baba Arihta me temanna Hagana ku kuta, maka i jambur kuta e jumpa ka kalak e ras Litna maka i petandaken Arihta me Litna ras Hagana temanna sini i babana.

“Sitandan min kena duana, ula ka kena sinik-sinik saja.” Nina Arihta menaken percakapen.

 “Hagana!” nina ka teman Arihta man Litna.

“Litna.” Nina ka Litna janah nyalami tan Hagana.

“Beru kai nge ndia kam agi rikut bere-berena?” nina ka Hagana erpenungkun nandangi Litna.

“Aku beru Sinuhaji, bebere Sembiring, bang!” ngaloi Litna, nina ka: “Kam, kai ka nge ndia merga ras bebere ni baba ndu bang?”

“Aku, Tarigan mergaku janah beberena, bebere Perangin-angin Bangun.” Jawab Hagana ngaloi penungkunen Litna.

“O..” nina ka Litna janahna senyum natap Hagana.

“Adi enggo kena sitandan jenda kena lebe nake. Lit ka sitik dahinku ku rumah, enggo i sms adek aku e, suruhna gelah pedas ku rumah.” Nina Arihta nyambung percakapen e.

“Ikh! Ku ja ka atemu e nak?” sungkun Hagana, sambungna ka nina: “Me mulih denga nge engko e? Ula kari tarun ngidah singuda-nguda darat oh, lupa ka ko nandangi kami!”

“Hehehe... Labo nak co..” nina Arihta ka ngaloi, “labo ka lupa aku! Kentisik saja nge, adi nggo dung kari minter nge aku mulihi ku jambur enda. Me labo dalih?”

“Labo, bang!” aloi litna, nina ka: “ula kam melaun, ya bang?”

Aloi Arihta ka, nina: “Uai, dek! Adi nggo kari dung, minter nge aku ku jenda ka.”

“Adi bage pedas ko nak!” nina Hagata.

“Uai! Dage jenda kena lebe ya?” nina Arihta janahna lawes nadingken Litna ras Hagana i jambur.

Arihta, em kapken sekalak anak perana sini i tandai i kuta e sekalak si mbacar, mehuli, ras mehamat nandangi orang tua bage pe teman-temanna. Maka kerina anak kuta rikutken teman-temanna erngena ate ras keleng nandangi ia.

“I ja nge ndia nggo seh cakapta ndai dek?” nina ka Hagana nerusken percakapen sienggo kentisik ndai lolo.

“Nggo seh Tigapanah, bang!” nina ka janahna cirem, cairken suasana si kentisik paksa ndai beku.

“Hehehe..” tawa Hagana ngaloi kata Litna ndai, nina ka: “uga ka makana seh ia Tigapanah dek-ku, lit ka kin nahena erdalan seh ku Tigapanah oh? Hehehe...”

“Hehehe...” tawa ka Litna ngaloisa.

Si tatapen ras si cirem-ciremen kalak e duana. Piah-piah lanai tergejab ranan e entah enggo seh ku ja saja.

“Kam, kai nge ndia kegiaten-du i kuta, dek ku?” erpenungkun ka Hagana man Litna.    

“Biasalah bang adi i kuta! Ku juma aron, bang.” Ngaloi Litna jawab penungkunen Hagana, sambungna ka salu erpenungkun man Hagana, nina: “Adi kam, kai nge dahindu, bang?”

“Hm... Adi aku seri ka nge ras Arihta dek. Sada ingan kami erdahin i sorum, dek!”

“o...” nina Litna janahna cirem ka natap Hagana.

“Bicara enggo lepas kari kerja tahun enda, dek. Me labo dalih nge kita jumpa dek, amin gia kam ras Arihta sirondongen?” nyungkun ka Hagana man Litna.

            “Hm.. Labo dalih bang! Adi jumpa kari atendu i telphon-du entahpe sms-kn du aku.” Nina Litna janah mereken nomor handphone-na man Hagana.

Paksa meriah percakapen dua kalak e (Hagana ras Litna), maka reh mulihi Arihta si ndai nari i rumah, ndapeti dua kalak e si sangana ercakap-cakap denga i jambur.

“Ikh! Meriah ku idah cakap kena e, kai saja nge si enggo rananken kena duana?” sungkun Arihta man kalak si dua e.

“Labo kai pe nak! Ula padah ko mbiar. Ertutur saja nge aku ndai ras impalta ena. Hehehehe...” nina Hagana ngaloi.

Percakapen antara dua kalak e memang entisik denga i benaken, paksa Arihta mulih ku rumahna nadingken kalak dua e ercakap-cakap, tapi teridah maka kalak e duana tempa-tempa enggo akrab. 

..........................

Enggo ka lepas kerja tahun i bas kuta Arihta ras Litna. Amin bage, rusur me Litna ras Hagana si sms’n entah pe si-telphonen bage pe rusur ka nge kalak e duana jumpa erbuni-buni, janah piga-piga teman-teman Arihta bage pe anak kuta enggo rusur ngidah kalak e duana rusur erdalan-dalan janahna ergandengan tan.

Enggo kel enterem kalak si ngaduken e man Arihta, tapi la teh Arihta kerna si e perbahan ngenana kel atena nandangi Litna bage pe perbahan tekna kel ia nandangi temanna si sada dahin ras ia bage pe si enggo i anggapna seninana, si Hagana!

“Cakap anak kuta kai pe lit nge, Arihta!” nina Arihta bas ukurna mantah pengadun ras cakap teman-temanna bage pe anak kuta.

........................

I Bas sada wari, lit me sekalak anak kuta (teman Arihta) si la sengaja megi percakapen antara Litna ras sekalak anak perana i bas hp nari. I begina maka erjanjin kalak e duana jumpa hari minggu e i Tahura. Megi si e, minter i jumpaina Arihta ras ngataken kerna si e. La tek Arihta ras la diatena kerna si e, tapi lalap i usahaken temanna e gelah tek Arihta ras ajak Arihta gelah ngikuti Litna, atena gelah i idah Arihta langsung kai sienggo i lakuken Litna i pudina. Salu mberat ukur ras la tek i uaiken Arihta ajaken temanna e gelah mastiken uga kin situhuna.

...........................

Enggo menda seh warina, wari Minggu wari i ja Litna ras sekalak dilaki erjanji jumpa i Tahura. I idah Arihta me Litna bagi ersikap, tempa atena lawes jumpai sekalak, maka salu erbuni-buni i ikutken Arihta me si Litna pudi nari.

Seh i Tahura, terus i ikuti Arihta perdalan Litna, maka arah jarak kira-kira telu puluh meter i idah Arihta me Litna jumpa ras sekalak dilaki sini i tandaina. Kepeken si “Hagana!” Seh senggetna kel Arihta ngidah si e, tapi si erbahansa ia reh senggetna paksa i gamdeng Litna tan Hagana, nce paksa kalak dua e dalan-dalan janah sigandengen mesra. La tahan nari ukur Arihta ngidah-ngidah si e, maka salu emosi i dahi Arihta me kalak e duana.

“Ikh...!” nina Hagana ras Litna (sengget). Perbahan rempet Arihta muncul i lebe-lebe kalak enda duana.

“Kam e pal..?” nina Hagana.

“Kam! Kam, nim!” nina Arihta salu sora megang ras ngelayangken kambal-kambalna ku ayo Hagana “Pa...rr...!”

Sada tinjun mendarat i ayo Hagana. Perbahan melasna kel ukur Arihta piah-piah lanai tertahanna emosina, maka piga-piga kali tinjunna mendarat i kula Hagana.

“La kusangka bage kepe perbahanenmu dua man bangku. Tek kel aku man engko duana, kepeken pudi-pudiku bage silakukenmu duana.” Nina Arihta salu emosi man Litna ras Hagana. Sinik saja kalak e duana (Litna ras Hagana) la i tehna harus uga.

‘Nce lawes me Arihta alu ukur si serbut ras kecewa. Mulih ia ku kutana salu keretana. I paccuna me keretana salu meter. I bas perdalanen mulih ku kuta, bas perukuren ras emosina si la stabil kurang-kurang meter lalap akapna keretana, maka kai pe lanai i gejabkenna...... kecelakan pe terjadi! Arihta luka parah ras i bas perdalanen ku rumah sakit Arihta lanai tertolong. Enggo leben ia ngadap ku lebe-lebe Dibata. Maka padanna enggo i sehkenna paksa si e, lawes me ia nadingken kerina rasa lalap.

Kejadin e erbahan nembeh ate anak kuta ernin Litna, perbahan i eteh kerina anak kuta kerna Arihta ras Litna selama e erteman meriah (sirondongen) kap, tapi perbahan kejadin e dalin-dalinna maka Arihta enggo lawes rasa lalap nadingken kerina maka melas kel ukur anak kuta ngidah-ngidah Litna.

................................

Rempet termedak Arihta! I pernehenna sekelewetna. Bingung ia! Erpenungkun i bas ukurna, nina: “engkai ka maka aku medem tengah pasar (jalan) e?”

           I idahna keretana (sepeda motor) ampar i tepi dalin, pas tedis atena rempet reh mobil truk melaju kencang ku arahna, nce nabrak ia. Perbahan senggetna, ngelebuh Arihta: “Tolong!” Tapi reh bingungna ia perbahan sangana truk nabrak ia sitik pe la i gejabna mesui, jadah turah ka penungkunen bas ukurna, nina: “Engkai maka sanga i tabrak truk oh ndai la aku luka tah pe mate?” seh kel bingungna arihta.

            Nce erdalan ia ku tepi dalan i ja keretana ampar. I angkatna kereta e tapi la mbera, i cubakena ka mulihi lalap la mbera, “Mungkin perbahan mbaru guling e aku maka la kesahku ngangkat kereta e.” Nina bas ukurna, sambungna ka: “Labo dalih! Ku tadingken saja gia kereta e, kari me banci kusuruh si Payo ngelegisa.”

            Sitik pe i bas perukuren ras pengingetna la ngeteh kai si enggo terjadi kerna ia. Maka i idahna lit angkot si ngadi minter ia kudatas angkot e.

.......................

            Seh i lebe-lebe rumahna. I idah Arihta maka enterem kalak si kubas-kudarat arah rumah e.

           

            “Ikh! Kai ka nge ndia e?” ersungkun ukurna, sambungna: “La ka kin ngata nande adina lit kerja-kerja i rumah maka la ku eteh sitik pe? Yah! Labo dalih. Mungkin gelah nyenggeti ate nande.”

            Maka erdalan me ia kubas rumah e. I idahna temanna si Payo kundul i teras, maka reh ukurna cakapi si Payo temanna kitik-kitik nari. Nina: “O, Payo!” lebuhna, tapi la ngaloi si Payo ras teridah tempa la perdiateken ia, maka nina ka: “sombong naring pe ko nak! Atek la sitandan kita maka ku lebuhi pe la diatem!”

            Lalap sinik saja si Payo, erbahan erpenungkun ka i bas ukur Arihta: engkai maka kerina jelma e la ndiate ia sanga ia ngerana, atena!

            Emaka erdalin ka Arihta ku bas rumahna. I idahna nande ras turangna kundul i amak i tengah-tengah jabu. Rupana mbulan, kusut, ras lesu bagi kalak latih ras ayona megara bagepe matana bagi kalak mbaru ngandung erkiteken kebenen. Tersungkun-sungkun lalap i bas pusuh Arihta: “Kai nge ndia si mbaru terjadi e? Engkai maka la ku eteh, ras engkaika maka la lit jelma si ngata man bangku?” Bage-bage rusur penungkunen i bas ukur Arihta kerna kai situhuna si enggo terjadi.

bersambung...