Lit sekalak si Merga Ginting i bas sada kuta, sini i gelari kuta Simalem. I ja i bas kuta e terberita maka ia sekalak si sehkel jorena ras bage pe anak-anakna kerina megiken ajarna. Permain ras kelana pe kerina kalak sini jore.
Selain jore, Ginting mergana e pe i tandai sekalak si mehuli, nggit nampati, menahang tanna mere, mehamat, ras patuh erdibata. Kerina pendahinna ras kegeluhen keluargana tuhu-tuhu nuduhken sekalak sini erkemalangen man Dibata, maka kade-kade rikutken kerina anak kuta erngena ate nandangi kegeluhenna ras keluargana.
Bas sada paksa, i dilo Ginting mergana me ndeharana, anak-anak ras permenna bagepe kelana, sembuyakna ras kemberahenna kerina, bage pe temanna sini i kelengina. I sungkuna me kerna uga carana gelah banci persada mulihi(lebih mengakrabken) keluarga e. Maka terjadi me percakapen sini cukup panjang paksa si e sini akhirna mbuahken sada ide: gelahna anak singuda beru Ginting si sada nari lenga erjabu arah lima sembuyakna, i pejabuken me ras impalna. Tapi! Mbiar kel si Ginting Mergana enda pekitik ukur ras sura-sura rikut pengindo anak si beru Ginting sini kelengina, maka i suruhna me nande beru Tambar Malem ndilo beru Ginting e gelah i sungkun me sura-sura geluhna.
Kenca beru Ginting anak singuda enggo seh i adep-adepen bapana, maka nina: “ O, bapa sini erkeleng ate nandangi anak’du si beru Ginting anak singuda e. Kai nge ndia sura-sura ukur’du makana i dilondu aku anak’du beru Ginting kuadep-adepen’du O, bapaku?” janahna erjimpu i teruh ingan bapana kundul, nina ka: “turiken dage kata sorandu, maka asa gegeh ku lit ku dalanken sura-surandu o, bapa!”
I tagang Ginting mergana tan si beru Ginting, janah nina ngaloi: “Anakku! Keleng kel ateku. Enggo kel ku idah rikutken ras nande’du beru Tambar Malem maka enggo kam mbelin. Jadi, la kuakap salah nungkun kerna sura-sura geluhndu ku lebe. Me payo nge akap’du turang nande Ginting’ku?”
“Payo kel, bapa!” nina beru Ginting ka ngaloi, sambungna nina salu erpenungkun: “Tapi, kai nge kin ndia si jadi sura-surandu nandangi anakndu si beru Ginting e?”
Ngaloi nandena si beru Tambar Malem, nina: “O, anak ku! Ersura-sura kel maka bapandu persada mulihi kerina kade-kadenta, maka bas paksa kentisik ndai i dilona kerina bapa-bapandu, nande, senina, turang, kakandu, rikutken eda-edandu encakapken kerna si e, janah turah me ide gelahna i pejabuken me beru Ginting anak singuda ras salah sada impalna. Tapi, mbiar kel bapandu enda pekitik ukur, pusuh, rikutken pengindo maka i sungkunna me atena lebe kam, o anak ku!”
“Uai, anakku!” sambung Ginting Mergana, nina ka: “Labo berarti enda jadi sada keputusen si mesti i dalanken’du anak ku. Amin gia lit ukur ndu sideban; bicara enggo lit kin pe teman’du meriah sini ngena atendu, labo kitik ukur bapandu enda ngaloken keputusendu oh, anak si ku kelengi!”
Erjabab beru Ginting, nina: “Labo, bapa! Labo kitik ukurku ras lengabo lit ukurku sideban. Jadi, ula padah aru atendu ngerananken kerna sura-surandu nandangi anakndu enda! Sebab kai sini i surakenndu, em me sini jadi i bas geluhku, bapa!”
“Ula bage anakku! Megogo kel pagi atendu. Adi ukurndu pepagi ceda, maka e berarti ceda ka me ukur bapandu enda, anakku!”
“Labo, bapaku! Ku eteh maka keleng atendu la ku akap mungkin kai sini i surakendu nandangi aku erbahan ukurku ceda ras nurahken kini gogon pepagi wari. Jadi, jadilah min kai sini suraken’du nandangi beru Ginting anak singuda e.”
Cirem Ginting Mergana natap si beru Ginting anak singuda si keleng kel atena. I gelemna tan anakna e, janah i emaina. Teridah matana erkaca-kaca ngidah anakna si beru Ginting si megiken ajar. Malem kel atena megi kata-kata sini belasken anak ulih ajarna ras beru Tambar Malem atena ngena maka la i gejabna naktakka iluhna.
Enggo salang – sai kel ukur si Ginting Mergana kenca megi-megi ranan anakna si beru Ginting. Tapi! Bingung denga ia, sebab lit denga empat kalak beberena si sebaya ras beru Ginting e si langa empo, janah i etehna maka peempat kalak ken beberena e erngena ate nandangi beru Ginting enda rikutken bibi bage pe bengkilana kerina. Maka i sungkunna ka mulihi si beru Ginting, nina: “Tapi anakku! I etehndu maka lit denga empat kalak impal’du e si lenga empao ras i eteh kami maka peempat ken bebere kami e rikutken turang kami rasken silih kami kerina erngena ate nandangi kam, anakku!”
“Uai, anakku!” nina ka nandena si beru Tambar Malem nyambung kata si Ginting Mergana. Sambungna ka: “Lit nge ndia arah empat kalak bebere kami e si jadi i bas ukurndu o, anakku?” sungkun nandena.
Jabab beru Ginting ka, nina: “I idahndu nge oh, nande – bapa! Kerina impal kami e erngena ate nge nandangi kami anak-anakndu beru Ginting ras kami pe erkeleng ate ka, tapi keleng ate kami e seri ras keleng kami nandangi turang – senina, ras keleng ate kami ka nandangi bibi ras bengkila seri ka nge ras keleng ate kami nandangi nande ras bapa. Jadi, kai si jadi sura-surandu, em si jadi sura-sura bas ukur kami anak-anakndu!”
“Bage kin tuhu o, anakku?” sungkun bapa tuana.
“Uai, tuhu bage kel ukur kami bapa!” jabab beru Ginting.
Teridah rukur si Ginting Mergana kerna si e. Bingung ia uga harus jadina erbahan kerna si e.
“Dage, uga nge ndia si bahan e o, kaka tua?” sungkunna man Seninana.
“Adi sungkundu aku o, agiku, labo ku beluh mbereken sada jawaben kerna ise, tapi adi uga sibahan nindu banci nge sidarami dalan sitepat.” Nina senina Ginting Mergana ngaloi penungkunen agina e.
“Maksud’du uga si bahan carana, Tua?” sungkun Ginting Mergana ka mulihi.
“Bagenda saja! Sibahan sada kerja-kerja sirempet-rempet maka tersengget sangkep nggeluh e! Sada kerja si kitik i bas paksa kentisik enda harus i lakoken, maka harus me erdahin(nampati) kerina bebereta salu pedas gelah kerja e terlakoken . I je pepagi si pindoken beberenta e me si tuhu-tuhu si erdahin, maka i je pepagi si idah me ise si tepat jadi teman anakta beru Ginting.” Nina senina Ginting Mergana ngaloi penungkunen agina e, sambungna nina ka: “I je kari siidah ise situhu-tuhuna bebereta e sini kelengna atena nandangi beru Ginting ras nandangi kita kalimbubuna.”
“Adi bage kin akapndu cara si tepat, bage me si lakoken Tua!”
******************
Kenca dung percakapen e, i telepon Ginting Mergana me peempatken beberena ras i suruhna pepagi reh ku rumahna guna rana-rana.
Sada wari kenca si e, enggo me pulung peempatken beberena e, em kapken: 1) Karo-karo Sitepu Mergana sekalak pengusaha sukses bidang konstruksi ras gundari kundul i legeslatif DPRD tingkat II, 2) Tarigan Silangit Mergana em kapken sekalak PNS(sekretaris camat) ras sangana dalanken usaha ekspor sayuren ku luar negeri ras nandangi ndungi studi S-2, 3) Perangin-nangin Bangun Mergana sekalak pengacara sukses bage pe pengusaha ras genduari sangana ka ngikuti program S-2 ka, 4) em kapken Sembiring Meliala Mergana si sekalak perjuma-juma, dahinna nampati orang tuana i juma ras pe sekolahna tamat SMA ngenca. Hahahaha.... ;-)
Kenca pulung kalak e, maka i turiken Ginting Mergana kerna sura-surana erbahan sada kerja si kitik si hanya ngundang sangkep nggeluh sindeher saja. Tapi, perbahan waktuna enggo sempit maka i dilona me peempatken beberena e gelah nyikapken keperlun kerja-kerja e gelah banci i lakoken.
Bersambung.....
Tidak ada komentar:
Posting Komentar
Mejuah-juah!