Turi-turi Anak Ginting Manik Mergana Kukenjahe

by: Bastanta P. Sembiring

I bas karaben wari paksa surutna matawari, ngalo-ngalo rehna berngi, paksa si juma nari mulih ku rumah. Terbegi me sora tangis teriluh arah jabu Ginting Manik Mergana, em kapken beru Sembiring Kembaren anak singuda tangis teriluh erdire-dire natap-natap perbulangenna Ginting Manik Mergana sienggo lawes nadingken ia. 

Tading me beru Sembiring Kembaren e ras Ginting Mergana si waluh bulan denga tubuh ku doni.

Tande warina, tangis ngandung la erngadi-ngadi piah ‘nggo sampur iluh i mata natap anak Ginting Mergana beberekel Kembaren si tading melumang. Tapi ibas paksa si e, anak kuta sini i arak-arak guru mbelin Karo-karo Karosekali Mergana reh ngadap ku jabu Ginting Mergana, mindo gelahna tinusur Ginting Mergana e i tangkuhken jadi Pengulu i tengah-tengah rakyat sirulo kuta Simalem aminna langabo dem umurna. Tapi bagi semalna, tinusur pengulu e secara turun-temurun mangku jabaten pengulu i bas kuta e.

“O, Kalimbubu kami Ginting Manik Mergana” nina Karosekali Mergana si Guru Mbelin bagepe anak beru tua Ginting Manik.

“Kai nge maksud ukur’du o, kam anak beru kami Karo-karo Mergana makana reh kam rikutken anak kuta ku jabu Ginting Mergana enda?” erpenungkun Ginting Mergana namdangi anak beruna Karosekali Mergana sih reh ngarak-ngarak anak kuta simalem ku jabu Ginting Manik Mergana.

“Sentabikel aku. Bagenda nge Kalimbubu kami.!” Sambungna: “Sieteh maka piga-piga wari sienggo lewat Pengulunta Ginting Manik Mergana enggo lawes ngadap ku Dibata.”

“Payo!” jawab Ginting Mergana. I sambungna ka salu erpenungkun, nina:  “Jadi! Kai nge sura-surandu kerna si e?”

“ Sieteh maka adi mate entahpe lanai kuh Bapa Kuta e, jabatenna e i susurken ku tinusurna. Bagem sura-rura kami o, Kalimbubu kami! Enggo me kuakap i angkaindu.”

“Hm...” kentisik Ginting Mergana sini kapken sembuyak Merga Ginting Manik (Pengulu) sienggo lawes teridah ertimbang-timbang. “Ku angka nge maksud’du e o, anak beru kami Karosekali Mergana.” Sambungna’ka: “Tapi, Bagi sini i idah maka Ginting Mergana sini i pupus sembuyaken kami Ginting Manik Mergana lengabo genep umurna setahu pe., bage pe peragin kami beru Sembiring Kembaren sini i tadingken, akap kami labo ngasup nggantiken dahin sini i tadingken perbulangenna emkapken sembuyak kami.”

“Payokel kata’du e, Kalimbubu kami!” nina ka: “engggo kapken sue arih kami bagepe ras kerina anak kuta maka iangkat me kalimbubu Ginting Manik Mergana e jadi Bapa Kuta i kuta Simalem enda amin gia umurna nguda denga, sabab bagi semalna enda silakoken nai-nai nari.”

“Ikh! Uga ka nge bahandu e o, Karosekali Mergana?” tepis Ginting Mergana. “Labo atan bage! Anak si kitik denga sibahan me jadi Bapa Rakyat Sirulo bas kuta Simalem enda! Payo kin pengakapdu e?” sambungna ka: “Uga nge ia kari banci ngelindungi rakyatna sebelang-belang kuta ras kesain, bagepe asuh-asuhen i mbal-bal adina ngerana ras tedis kin pe langabo ia beluh? Nggo silang-lang kuakan bahandu e!”

                                                                                                    

“Sentabi kalimbubu kami. Payokel katadu ena! Tapi, nina ukur kami anak e me sipantasna jadi Bapa Kuta i kuta Simalem enda.” Lanjutna: “Angka kami nge maksuddu e, maka ningen kami: bicara anak enda genduari si tangkuhken jadi Penghulu i kuta Simalem enda, tetap nge sibahan si mangkusa. Nandena entahpe si sembuyaken bapana sini akap kita cocok, seh pepagi mbelin anak enda maka ia sepenuhna ngelakoken pendahin kepengulunna bagi arusna. Uga akapdu kalimbubu Ginting Manik Mergana.?” 

“Adi bagekin akap’du sipayona anak beru kami, bage me silakoken!”

********************

“O, Bapa Manik! Engkai maka alokendu saja ranan Karosekali Mergana oh ndai? Aturna min ranandu nge man beginken ras i lakokenna!” nina kemberahen Ginting Mergana.

“Engkai maka bage nindu o, Nande Manik?”erpenungkun Ginting Mergana nandangi ranan ndeharana.

“Kam! Atek la i eteh’du maka Kalimbubu e seri kapken ras dibata doni, maka rusur nge i kataken dibata sini i idah.”

“ Ikh! Langa kap kuangka kai maksud’du e.”

“Motukel kuakap kam o, bapa Manik! Kam kapken sembuyaken Ginting Manik Mergana si enggo lawes ndai, bagepe kalimbubu Karosekali mergana oh. Jadi, sipantasna ranandu me man beginken, bagepe adi pengakapku kam nge si pantasna jadi Bapa Kuta i tengah-tengan kuta Simalem enda o, bapa Manik!”

Piga-piga paksa teridah Ginting Mergana e bagi tempa-tempa mbages perukurenna. Mondar-mandir i tengah-tengah jabu.

“Payokel nina Eda ena o, turang Ginting Mergana!” rempet reh beru Ginting turang Ginting Mergana. Nina ka: “aku pe labo kuakap atan ranan Karosekali Mergana ndai, turang!”

“Ikh! Sengget ka pe aku i bahandu turang!” Jawab Ginting Mergana.

“Ena! Me turangdu pe nggo ngataken bage, bapa Manik!” nina ndehara Ginting Mergana.

“Bingung kapken aku bahan kena e.”jawab Ginting ka.

“Engkai maka kam bingung o, turang Ginting Mergana? La kin i eteh’du maka kam kapken genduari sintuana i jabu ras sembuyaken Ginting Manik Mergana e kerina, sini kapken tinusur Bapa Kuta nai-nai nari i tengah-tengah kuta Simalem enda.” nina beru Ginting Manik. Sambungna ka: “Jadi, engkai maka pupus turang kami si enggo lawes ndai sini ngudasa denga si i jadiken Bapa Kuta bas inganta enda? Lakin akapdu kurang payo e?”

“Uai, bapa Manik! Payokel kuakap kai nina turangdu e o, bapa Manik.” Sela nande Manik.

“Uai, turang! Kam nge si pantasna jadi Bapa Kuta i kuta Simalem enda!” nina beru Ginting Manik ka.

“Hm....! Jadi! Uga nge perbahanenku kerna si e? Adina anak kuta pe enggom ngatakensa ia si pantasna jadi Bapa Kuta i kuta Sialem enda?” erpenungkun Ginting Mergana nandangi si dua diberu e.

Kentisik percakapen e bagi tempa-tempa ngadi. Teridah telu kalak e rukur mbages-bages.

“Bagenda saja, bapa Manik! Ikutkendu saja bagi sini enggo i aturken anak berunta Karosekali Mergana ras anak kuta kerna penangkuhen enda. Ibas arih-arih pepagi maka ngerana kami gelah kam simangkusa, entahpe mewakili kepengulun enda. Jadi, la mungkin kuakap i tolak anak kuta. Sebab i eteh maka kam me sintuana ibas kerina jabu Ginting Manik Mergana i belang-belang kuta Simalem enda.”

“Jadi uga nge?” sungkun Ginting Manik mulihi.

“Adi enggo kam kari simangkusa, maka sibeneken (bunuh) anak e kari pudi wari e glah ula teridahkel i mata anak kuta maka kita la senang.” Sambung ndehara Ginting Mergana, nina: “Adi nggo bene anak e, ugapape me i darami gancihna. Ise nari, adi la kam? I eteh maka kam me sintuana si tading i jabu Gnting Mergana e ras si eteh maka Ginting Mergana oh ndai sisada nge  ras labolit sembuyakna.

“Hm...! Jadi uga nge sibahan carana mbenekensa.?” Sungkun Ginting Mergana ka mulihi.

“Uga adi sipindo racun man peraji-aji? Em si tamaken ku nakan nande anak e, gelah nandena mate ras anak e sibeneken salu Tendi Nunda. Uga akap kena?” jawab beru Ginting Manik.

“Cocokkel kuakap bagi kata turangdu ena, bapa Manik!”

Nggo me sue arih Ginting Mergana e rikutken ndehara ras turangna, maka mbeneken anak Ginting Mergana sembuyakna sienggo lawes bagepe ras nandena beru Sembiring Kembaren.

********************

Gendek cerita, maka melalakel rencana-rencana busuk Ginting Manik Mergana rikutkan ndehara, turang, bagepe juak-juakna guna meneken (bunuh) pupus sembuyakna si kitik denga bagepe ras nandena. Tapi, anak Ginting Mergana ras nandena beru Kembaren e i pasu-pasu Dibata Simada Kuasa kap, maka piga-pika kali selamat kalak si dua e ibas rencana-rencana busuk sembuyaken bapana siatena meneken ia.

Ibas sada paksa enggo latihkel akap Ginting Mergana bagepe pengikut-pengikutna guna meneken Merga Ginting Manik si kitik denga e. Bagepe nggo tersiar berita i belang-belang kuta, kesain, bagepe ku permakan i mbal-bal maka rencana-rencana busukna guna meneken anak e. Kondisi si bage rupana erbahan Ginting Mergana e jadi panik ras mbiar adi kari rempet anak kuta erpenembeh nandangi ia bagepe keluargana. Emaka, i dilo Ginting Mergana ndehara, turang, bagepe juak-juakna guna ngerananken berita e ras muat sada rencana si banci nyelamatken ia ras keluargana bagepe banci meneken pupus mendiang sembuyakna si jadi duri i bas perukurenna.

Sue enggo arih Ginting Mergana bagepe ras kerina pengikut-pengikutna guna gelah banci meneken anak sembuyakna bagepe ras nandena. Maka enggo i susun rencana ras i bas waktu si deher e bakal i dalanken. Maka bage i suruh Ginting Mergana juak-juakna guna ndarami anak perana si pertandang i kuta Simalem jadi alat guna pedalan rencana busukna e.

**********************

I bas sada paksa, muat lepasna ciger wari, medem me beru Sembiring Kembaren i kamarna rikutken anak sikelengina Ginting Manik Mergana. Teridah maka enggokel metabeh perpedemna bagepe anakna, maka sora si megang pe megati lanaibo i begina.

I bas pertabehna perpedemna, maka kai kin pe siterjadi lanaibo i gejabna, masuk me sekalak juak-juak diberu sini erdahin i jabu Ginting Manik Mergana muat anakna si Ginting Manik ras mbaba anak e ku tengah-tengah kesain gelah i idah kerina anak kuta Simalem, maka anak e la ras nandena tapi ras juak-juak jabu Ginting Manik Mergana.

I bas kamarna beru Sembiring Kembaren tayang i bas perpedemna maka la i gejabna sekalak parang mbelin enggo ku bas kamarna. Tedis parang mbelin e i tepi tingkap kamarna gelah anak kuta sini lepus arah jabu e ngidah ia tedis i balik tingkap kamar beru Kembaren anak singuna. Dung si e parang mbelin e bene arah kuta e, maka ise pe la pernah ngidahsa i kuta. Bagem i lakokenna piga-piga kali erbahansa turah cakap si mejin i tengah-tengah masyarakat.

Perbahan nggo mbarkel cakap e i tengah-tengah anak kuta Simalem, maka reh tua-tua kuta ku jabu Karosekali Mergana selaku sekalak guru mbelin sini i segani i kuta bagepe selaku anak beru Ginting Manik, guna encakapken berita-berita si mejin si mbar i tengah-tengah anak kuta. Maka i suruh Karosekali Mergana juak-juakna guna nungkun man beru Kembaren kerna berita-berita simejin e. Bingungkel beru Sembiring Kembaren megi-megisa, sebab labo pernah i etehna kai si sangana terjadi, maka salu kontan beru Sembiring Kembaren mbantah berita e, sabab tehna maka ia benar la pernah ngelakoken bagi sini i cakapken anak kuta. Tek kel Karosekali Mergana nandangi kemberahen mendiang Kalimbubuna e maka lanai i pegedangna masalah e i bas ia, tapi reh dekahna reh mbarna berita e erbahan maka anak kuta lanai tenang.

Ngidah perbahanenna si erdalan lancar bagi sini i rencanakenna, meriahkel ukur Ginting Mergana, ndehara, turang, bagepe kerina pengikutna. Amin bage, langa puas ukurna ope dengan bene anak e bagepe ras nandena, maka erencana ia manfaatken situasi e guna beneken anak e. I suruhna juak-juakna guna nggarai perukuren anak kuta gelah ernembeh ate nandangi beru Sembiring Kembaren nande si Ginting Manik anak melumang.

*********************

Ciger wari. Paksa jelma sienterem erdahin i juma, beru Sembiring tayang bas perpedemenna bagepe anak sikelengina. Perbahan tabehna perpedemna piah-piah la i gejabna kai si terjad.

Sekalak juak-juak diberu masuk ka ku kamarna muat anak sikelengina ras mbabasa keliling kesain gelah i idah anak kuta, bagepe ku mbal-bal gelah i idah kerina permakan. Bas tabehna perpedemna maka la i gejab beru Sembiring maka nggo kubas kamarna sekalak parang mbelin. Tedis parangmbelin e i tepi tingkap maka kerina kalak si lepus i idahna ia, e erbahansa gara perukuren kalak singidahsa, maka reh piga-piga anak kuta e ku jabu Karosekali bagepe ku jabu Ginting Manik mergana ngaduken asalah e.

Meriahkel ukur Ginting Mergana megi-megisa berita e. Maka i garaina perukuren anak kuta e, i ajuk-ajukna anak kuta gelah reh rawana ras ndahi jabu ingan beru Kembaren ndehara sembuyakna e medem. I ja enggo i rencanakenna ope si e sada rencana si mejin guna beneken peraginna e.

Iarak-arakna anak kuta e ku jabu ingan peraginna e medem. Seh i lebe-lebe jabu e, minter ia ras piga-piga anak kuta ku bas jabu e. Maka la tanggung senggetna anak kuta ngidah beru Sembiring medem ras i sampingna sekalak parangbelin medem ka. Maka turah ranan-ranan si ejin ras megang erbahan sengget beru Sembiring Kembaren maka rempet ia medak. Pas bukana matana seh kel senggetna ia ngidah anak kuta ras sekalak parangbelin medem i sampingna. Piga-piga anak kuta minter narik parang belin e ku darat jabu e maka ise pe lanai ngidahsa ras metehsa ku ja lawesna ras uga parangbelin e, sedangken beru Sembiring tading i kamarna, bingun la tehna kai sienggo terjadi.

Enca e i arak-rak anak kuta me beru Sembiring Kembaren ku tengah-tenagah kuta. Maka ngerana me Ginting Mergana sembuyak mendiang perbulangenna. Nina: “endam! Endam contoh sada diberu si erbahansa maka kutata e sial. Kerna perbahanenna si mejin maka banci erbahan nini-ninita nembeh.”

“Payo! Payokel!” nina anak kuta ngaloisa.

“Abu perbulangenna ndai pe lengabo i ombakken, beguna pe lenga bo lawes arah jabu e, nggo bage perbahanenna! Engkai maka nembeh ate begu-begu ninita ninta rusur, bage kepeken perbahanenta.” Nina ka pernanden sideban.

“Me enggo si idah uga perbahanenna. I berekenna anakna gelah i jaga kalak, sedangken ia ras dilaki sideban si la tandai dua-duai i kamar. Mejile kin bage?” nina ka beru Ginting: “Mela siakap adi bage pernanden kuta e, ula kari jadi kuan-kuannen belang-belang Taneh Karo Simalem enda, maka pernanden kuta Simalem sibagidi rupana. Apaika nande sekalak keturunen pengulu calon Bapa Rakyat Sirulo e. E, mela kel kari siakap, nake!”

Melala kel turah cakap ras perukuren paksa si e si ngataken maka beru Kembaren e arus i ukum. Maka perbahan biar kata bana e kari jadi kuan-kuanen si mejinken gelar kuta Simalem e, maka i putusken gelah beru kembaren e i ukum i datas api gelah ula nadingken bekas si la mehuli man kuta Simalem bagepe si ngianisa.

Lit si la setuju, tapi teremen nggo si setuju kerna keputusen e. Ngidah si e, ermamang ate kel Karosekali Mergana sabab tek ia maka beru Kembaren si kapken kemberahen Kalimbubuna Ginting Mergana e labo ersalah, maka iusahakenna gelah ukumem e la i dalanken tapi mekeng kel keluarga Ginting Mergana bagepe kerina anak kuta si ndukungsa maka ukumen e arus i laksanaken. Iajuk-ajuk Karosekali Mergana kerina tua-tua kuta, guru mbelin, bagepe anak kuta lainna gelah ukumen e la surung, entahpe ukumenna i sambari salu pedarat beru Kembaren enda arah kuta Simalem nari, amin bagepe mekeng denga perukuren keluarga Ginting Mergana bagepe kerina anak kuta sini ndukungsa gelah pedas ukumen e i lakoken.

Latihkel enggo akap Karosekali Mergana e ndarami dalan guna nyelamatken beru Sembiring Kembaren arah ukumen tutungen bagepe enggo ka nge latih akapna ngajuk-ajuk anak kuta kerina, tapi lalit ertina. Maka enggo kerikel akalna.

********************

“O, nande beru Ginting! Uga nari nge sibahan maka banci nyelamatken tinusur bagepe ndehara sini kelengi mendiang kalimbubunta Ginting Manik Mergana o, Nande? Enggo latihkel akap anakdu enda, maka peseh ajar pedahdu nandangi anak kekelengendu enda, oh nandeku!” ngerana Karosekali nandangi nandena beru Ginting Manik.

Erjabab nandena, nina: “Ku eteh nge uga enggo perbahanendu nandangi kalimbubuta Ginting Mergana o, anakku!” nina nande Karosekali Mergana si beru Ginting Manik. Sambungna: “Lit nge pagi malemna anakku, labo pagi sia-sia kari kerina si enggo i lakokendu e. Reh nge pagi dalan simehuli guna nyelamatken ras empersada kalimbubuta subuk siapaipe.”

“Tapi. Biarkel aku, nande! Biar aku paksa si e labo pepagi reh. Sabab enggo kuidah kerna perukuren ras perbahanen kalimbubuta kerina. Amin bagepe, nande labo lit ukurku ertimbang belah kerna kerina kalimbubu e amin bage pe perbahanenna lalap nge ku ergai kerina kalimbubu e o, nande ku.” Nina Karosekali Mergana.

“Kuangka nge, anakku!” jabab nandena, nina ka: “Lakokenlah anakku kai sini akapdu perlu ras benar i lakoken.”

“Bujur, Nande!” nina ka Karosekali Mergana.

********************

Sada berngi ope ukumen tutungen e i lakoken, i dilo Karosekali Mergana kerina sembuyakna ras juak-juak si tek ia guna ercakap-cakap ngukuri cara nyelamatken kemberahen kalimbubuna Ginting Mergana bagepe anakna. Maka enggo sue arih, bas berngi si e ka i tangko me kemberahen kalimbubu Ginting Mergana e bagepe pupusna arah jabu Ginting Mergana guna ibaba (iasingken) ku kenjahe. Ras kerna si e kerina i kataken Karosekali Mergana gelah i kerna si e i buniken kel arah ise pe.

 Ersambung (to be countineu) ...

I JABU Ginting Manik Mergana. Piga-ga teridah guru sibaso rikutken anak kuta enggo pulung i je, tapi sada pe i bas tegun anak beru Ginting Manik Mergana subuk Karo Sekali Mergana entahpe Meliala Mergana la teridah paksa si e.

Ngenehen si pulung enggo me enterem maka tedis me gamet Ginting Manik Mergana em kapken Ginting Sugihen Mergana. Ngerana ia, nina: “Bujur siakataken ku adep-adepen nu Dibata simada kuasa,  erkiteken kita enggo banci pulung salu mejuah-juah i jabu senina kami Ginting Manik Mergana enda.” Lanjutna, nina: “bagi si enggo teh kita maka piga-piga paksa sienggo lewat pengulunta Ginting Manik Mergana sini kapken sembuyaken Ginting Manik si mada jabu enda enggo nehken padanna ngadap ku dibata. Maka siakap pe labo mejile adi kutanta enda lalit si mimpinsa.”

            “Payo kata du ena o, Ginting Mergana!” ngaloi sekalak perbapan sini pulung paksa si e. Sambungna: “Enggo kapken sue arita kerina, bagepe rikutken tradisinta nai-nai nari maka adi mate entah pe bapa kuta e lanai kuh (sakit, cacat,dll) jabaten kepengulunna e ilanjutken tinusurna (pupus/anak). Ku akap enggom sieteh kerna si e?”

“Hm..! Pas me kata’du ena silih!” ngaloi ka perbapan sideban.

“Adi kuakap, kerna si e lanaibo man permasalahenta. Me bage?” sambung sekalak pernanden ka.

Kentisik teridah sini pulung i je erkusik-kusik sapih-sapih ia sesampingen.

“Ku angka nge maksud kena e!” nina ka Ginting Sugihen Mergana sini kapken gamet i jabu Ginting Manik Mergana. Nina ka nyambungsa: “Tapi, me si idah ras nge? Maka anak e lengabo genap umurna setahun pe. Uga nge nina mimpin kuta e, njagai keamanen ras perdamen kuta, bagepe suan-suanen i juma rikutken kerina rubia-ribui ni asuh subuk i kesain bage pe i mbal-bal? Adi tedis ras ngerana kin pe lengabo ia ngasup!”

Teridah rukur kerina jelma sini pulung paksa si e megiken ranan Ginting Sugihen Mergana.

Erjabab ka sekalak sini pulung paksa si e, nina: “Payo, Ginting Mergana! Tapi bagi semalna silakoken maka, adi anak e lenga seh umurna entahpe langa siakap ngasup, amin bage pe tetap nge ia si pantasna entah pe salu kata sideban tetap nge ia si i jadiken jadi pengulu i tengah-tengah rakyat sirulo enda. Adi kerna kini ngasupenna, si dalankenka bagi sienggo rusur silakoken, em kapken: adi siakap anak e langa cukup umurna ras pe lenga siakap ia ngasup, sibahan me si mangkusa (menyokong, nopang; mewakili wewenangnya), adi biasana enda nandena, seninana, entahpe sembuyaken bapana sini akap kita cocok.  Me bage nake?”

“Payo, payo...” nina ka kerina si pulung.

“Payo! Aku pe bage nge ku akap! Tapi, ciger wari ndai me enggo ka ras-ras siidah bagepe sibegi kerna berita si la mehuli si enggo terjadi i kuta Simalem enda? Si eteh maka kejadin e ngelibatken nande calon pengulunta entah pe kembrahen mendiang pengulunta si enggo lawes nehken padanna piga-piga paksa silewat. Kerna si e ku akap perlu nge kita rukur, ula kari pepagi si e jadi sada hal simbahansa turah hal-hal si la mehuli i tengah-tengah kuta simalem enda.” Nina Ginting Sugihen Mergana ka.

“Ku akap pe pas kel kata’du ena turang!” ngaloi beru Ginting Manik. Sambungna, nina: “mela kel siakap adi i eteh jelma sinterem i belang-belang Taneh Karo enda adi nande pengulunta, entahpe kemberahen mendiang pengulunta diberu si la mehuli perbahanenna. Ku akap pe perlu nge kita rukur mulihi kerna si enda!”

“Bage nge ku akap pe! Mela kita!” tambahi sekalak pernanden.

“Jadi, uga nge dage sibahan?” nungkun sekalak perbapan.

“Adi usul-ku! Uga adina Ginting Manik Mergana simada jabu enda saja siangkat jadi pengulu kuta Simalem enda? Sebab ku akap kin pe ia nge si pantasna. Umurna enggo nge pantas, pemetehna, bage pe ia me salah sada sembuyaken mendiang pengulunta si tuana, jadi dareh pengulu e tuhu-tuhu nge lit bas ia. Uga nge ninta?” nina sekalak ka perbapan.

“Cocok! Adi ku akap pe bage nge simejilena.” Nina ka sekalak pernanden.

“Uga nge? Enggo nge sada katata e? Setuju dage kita adina senina kami Ginting Manik Mergana simada jabu enda jadi pengulu i kuta Simalem enda? Uga dage?”

            “setuju! Setuju! Setuju..! “erjabab kerina si pulung paksa si e.

Kenca si e, minter tedis Ginting Manik Mergana. Ngerana ia, nina: “Bujur! Bujur! Bujur ku kataken man bandu kerina.....”

********************

Paksa anak kuta ras keluarga Ginting Manik Mergana pulung i jabu. Pengikut-pengikut Karo Sekali Mergana enggo mulai ergerak nuju ingan i ja beru Sembiring Kembaren i kurung.

 Pitu kalak erbaju mbiring ras ayona i tutupi kerina, maka matana naring nge sini i idah, kalak e enggo cabuni i peren-peren antara ranggas-ranggas kayu sini jarakna kira-kira dua puluh lima depa (25) arah sapo i ja beru Kembaren e i kurung. Sapo e letakna  i juma Ginting Manik Mergana tepatna i belakang jabu Ginting Manik si jarakna kira-kira seratus depa arah jabu e.

Pitu kalak si jago ndikar (silat) ras si seh kel mbisana (sakti) e, ersiap-siap arah balik ranggas-ranggas si gelap. Sekalak arah si-pitu e nutung pulungen bulung-bulung sini buatna arah sumpitna ras sidebana ngipasi geleah gebuk tutungen e erpencar. Gebuk tutung-tutungen e ngeliningi sapo e ras maka kerina si nganggehsa gebuk e tertunduh.

I idah kalak si-pitu e maka juak-juak Ginting Manik Mergana si paksa erjaga enggo tertunduh, minter masuk kalak e ku bas sapo ingan beru Kembaren i kurung, ‘nce i babana beru Kembaren si ikut tertunduh perbahan nganggeh gebuk tutungen ndai ku sada ingan sienggo i janjiken ras Karo Sekali Mergana. Perbahan tabehna perpedemna, juak-juak Ginting Manik e la nggejabken maka beru Kembaren enggo i tangko arah kurungenna. Tapi, kalak si-pitu e lalit ngidah i ja anak Ginting Manik Mergana, amin bage, perbahan biarna kalak e tereteh minter ia lawes arah ingan e.

*******************

I perdalanen, sekalak anak kuta ngidah maka lit pitu kalak si erbaju mbiring kiam arah sapo Ginting Manik Mergana. Sengget kel kalak si ngidahsa e, maka minter kiam ia ku jabu Ginting Manik Mergana guna ngelaporken berita e.

Seh i jabu Ginting Manik Mergana, i turiken kalak e kerina kai sini i idahna. Megi berita e, seh kel senggetna ras rawana Ginting Manik Mergana, maka miter i dilona juak-juakna simbisana ras si jago ndikar gelah ngikutken ia ku jabu Karo Sekali Mergana.

********************

I JABU Karo Sekali Mergana.

“O, Kam anak beru kami Karo Sekali Mergana!” ngelebuh Ginting Manik Mergana arah kesain jabu anak beruna Karo Sekali Mergana salu sora si seh kel megangna.

Kudarat Karo Sekali Mergana arah jabuna, arah datas pantar-pantar rumahna muatna kuteruh arah anak-anak tangga rumahna ngaloi ia, nina: “Kai nge dia ‘dai Kalimbubu kami Ginting Manik Mergana, maka tengah berngi e kam erlebuh-lebuh salu sora si megang?” Gundari Karo Sekali Mergana enggo tepat tedis i lebe-lebe  Ginting Manik Mergana.

Erjabab Ginting Manik, nina: “Ku eteh kel maka kam o, anak beru kami, la senang kerna ukumen sini bakal ialoken peragin kami em kapken beru Sembiring Kerbaren. Ras tangkas teridah kerna sura-runa’du gelah ukumen e la i dabuhken nandangi kembrahen sembuyaken kami e.”

“Payo kata’du e kalimbubu kami!” jawab Karo Sekali Mergana, maka i sambungna katana nina: “Adi bage kin, kai nge tujun’du reh ku jabu anak berundu e o, kalimbubu kami?”

“Tangas teridah ka salu mata sidua arah sekalak anak kuta, maka pitu kalak si erbajuken mbiring enggo nangko beru Kembaren arah ingan kurungenna!” nina Ginting Manik, sambungna salu erpenungkun : “uga nge akap’du kerna si e?”

“Engkai ka maka sungkun’du kerna pengakapku o, kalimbubu?” sela Karo Sekali Mergana.

“Sabab ku eteh maka, kam nge ngenca si ersura-sura kerna si e o, anak beru kami Karo Sekali Mergana!” nina ka Ginting Manik.

“Ikh! Kitik kel ukurku kerna kata’du e o, kalimbubu! I eteh’du maka kami kerina anak berundu subuk i jabu Karo Sekali Mergana bage pe Sembiring Meliala Mergana patuh ras setia kel nandangi kalimbubu Ginting Manik Mergana e. Jadi, la kap ken mungkin adi kami ersura-sura kerna si e.”

“Labo aku tek kata’du e o, Karo Sekali Mergana. Sebab enggo lit saksina, lanaibo lit dalinna kam ngeluk.”

“Adi kin kam la tek o, kalimbubu Ginting Manik Mergana! Labo ateku megogo amin gia i periksanu kerina isi jabu e o, kalimbubu kami.”

I suruh Ginting Manik Mergana piga-piga juak-juakna gelah periksa kerina isi jabu Karo Sekali Mergana, tapi lalit kai pe i jumpai juak-juak e selain isi jabu em kapken keluarga Karo Sekali Mergana.

“Ku sungkun kam o, Karo Sekali Mergana! I ja i buni ken du beru Sembiring Kembaren e?” sungkun Ginting Manik salu sora si megang.

“Enggon ku kataken ras pe enggom i periksa du jabu e! Me teh du sekalak nge uga jababna!” ngaloi Karo Sekali Mergana.

“Hm..! Adi bage ku timai beru Sembiring Kembaren i jabu kami! Adi seh terkuak manuk beru Kembaren e lenga reh ku kami, maka teh du nge pepagi kai si bakalen terjadi nandangi anakna em kapken pupus sembuyaken kami Ginting Manik Mergana si enggo lawe! Hahaha....” ngancam Ginting Manik Mergana, nce pinter ia lawes janahna tawa megang.

Megi-megi ancamen e, mbiar kel Karo Sekali Mergana. E maka i dilona anakna si dilaki gelah njumpai seninana Sembiring Meliala Mergana gelah ndarami i ja ingan anak Ginting Manik Mergana i buniken bage pe ras nangkosa. ‘Nce e minter nge berkat anak Karo Sekali Mergana e ku jabu Sembiring Meliala Mergana.

*******************

Seh i jabu Sembiring Meliala Mergana, i ceritaken Karo Sekali Mergana e kerina kai si enggo terjadi ras kai sini i suruhken bapana geleh i pesehkenna man bapa ngudana Sembiring Meliala Mergana e.

Sengget kel Sembiring Mergana kenca megi-megisa, maka perbahan biarna kel ia si la mehuli e terjadi, minter i dilona ka anak-anakna si dilaki bage pe juak-juakna. ‘Nce minter me ia berkat ndarami anak kalimbubuna Ginting Manik Mergana e. Kerina kesain-kesain, jabu-jabu, jambur,  bagepe sapo-sapo sini lit i periksana, tapi hasilna la lit idahna entah pe i datna berita i ja anak kalimbubuna e i buniken. Latih enggo akapna ndaramisa, tapi perbahan biarna kel ia i suruhna gelah anak-anakna ras juak-juakna erpencar ras tetap ngarami, bagepe ia ras piga juak-juakna tetap darami i tengah berngi si ngo-ngo e.

********************

I PENDONEN. Rempet medak beru Sembiring Kembaren ras seh kel ia senggetna ngidah pitu kalak parang belin erbajuken mbiring ngekliningi ia. Tapi, ngerana sekalak arah pe-pitu kalak e, nina: “Ula kam mbiar bibi,. Kami suru-suruhen Karo Sekali Mergana.” Kenca mbegi si e emaka tenang beru Sembiring Kembaren, tapi mulihi ka ia panik erkiteken anakna Ginting Manik Mergana....

Piga-piga paksa reh ka me Karo sekali Mergana ku ingan e. Ngerana ia, nina: “Enggo mbages kel berngi e, tapi seninaku Sembiring Meliala Mergana lalap la teridah. Adi seh paksa manuk terkuak pepagi la jumpa si man daramen, lanaibo ku angka kai si harus si lakoken ka.”

Kenca e teridah me Sembiring Meliala Mergana. Ngidah sie eriah ukur Karo Sekali Mergana, tapi perbahan la i idahna ise pe ras Sembiring Meliala Mergana e, mulihi ringut ayona e.

“O, senina ku! Enggo kel latih ku akap rikutken anak-anak bage pe juak-juakta, maka terdaram-daram kami ras seh paksa gundari e pe erdalan denga nge anak-anakta rikutken temana sedalanen kerina darami anak kalimbubuta e, tapi seh detik e lenga lit ku begi berita simehuli o, senina ku.” Nina Sembiring Meliala Mergana.

“Aku pe menam-menam lanaibo ku angka o, senina ku.” Erjabab Karo Sekali Mergana, sambungna: “Adi seh kari paksa terkuak manuk si man daramen e la jumpa-jumpa, enggo me mosar kerina sini rencanaken e o, senina ku.”

“Heh....” teridah rukur kalak si dua e, ayona ringut..

"Mungkin, enggo me padanna bage seninaku.... tapi amin bage gia, tetap nge kita erusaha.” Nian Meliala Mergana.

“Uai, seninaku.” Jawab Karo Sekali Mergana ka.

Terbegi sora tangi beru Sembiring Kembaren “ Anakku...........” nina ka ngerana: “ aminna mate kin pe labo ateku megogo, asalken anak si ku kelengi e selamat. Mungkin enggo kin padan ku bage, labo dalih gelah anak si ku kelengi e selamat....... Ope terkuak manuk pepagi wari e, reh me aku nyerahken bana ku jabu Ginting Manik Mergana.....” nina beru Kembaren.

Latih kel akap Karo Sekali Mergana bage pe Sembiring Meliala Mergana megi-megisa, tapi uga i bahan adi enggo bagenda jadina.

Bersambung......